عرض مشاركة واحدة
قديم 07-01-16, 08:23 PM رقم المشاركة : 9
الكاتب
الرازق الله

متداول

 

احصائيتي




آحدث المواضيع
الإتصال

الرازق الله غير متواجد حالياً

 



اقتباس:

المشاركة الأصلية كتبت بواسطة كالسيوم مشاهدة المشاركة

اعتقد ان الازمه عالميه وليست محليه
وهذا كفيل بأن السبب ازمه عالميه
تداخلت فيها الأمور ما بين حرب اقتصاديه وحرب فعليه مع انكماش اقتصاديات كبيره كالصين مع انخفاض للبترول نتيجه لهذه العوامل وايضاً إغلاق الخط أما النفط الصخري و. و .
الله يعين .. لن ينجح الا من يتحلى بالصبر

يعين الله

اليوم نفذ صبري وطلعت ولله الحمد والشكر

الإنتظار أراه أفضل في قادم الأيام

مثل ماتفضلت يا أخي الفاضل، تراكمت علينا الأخبار السيئة من كل صوب وجهة

خلنا ننكمش من الإنكماش والتقشف زين يقولوا في البرد

إذا الله عطانا عمر، وباقي عندنا حيلة، راح نرجع للسوق، ولا يمنع إن الواحد إذا شاف فرصة يغتنمها

على طاري يغتنمها، أذكر قبل حول العشرين سنة، اكثر شوي كان أحد أبناء العم عنده مزرعة، وتعرفوا عاد هذيك الأيام كانت الفلوس شحيحة، قال لي وش رايك يود العم نشتري لنا كم نعجة نربيهم؟؟؟

قلت له من وين لنا يبن العم، قال ما عندك 1000 ريال، قلت له إمبلى عندي وانا ود عمك، قال خلاص، انا 1000 وإنت 1000 نشتري لكنا كم نعجة

قلت له يمكن ما يجيبوا لنا شي، قال الخميس وعدنا، وأليس الخميس بقريب

قلت له على الله توكلنا

جا يوم الخميس، قال يبن العم إصحى من النوم، قلت له وما عندك في هذه الساعة المبكرة، قال اقول لا يكثر قوم وتروش او حتى أغسل وجهك يكفي، لأن مشوارنا مشوار خياس

قلت عسى خير

ركبنا الونيت اللي كان موديل 81 شفروليت حجم 10 وكان لونه ازرق سماوي

ومشينا ووقفنا في محطة قال إنزل وجيب لنا كم فطيرة على عصير على كم غشرة ماء

قلت له وين ساير، قال للخير رايح

مشينا لين وصلنا قريب الحفر، وكان فيه على الطريق يمينا ويسارا لوح إعلانات خطت بأيدي عامية، لا تعلمت الخط وعلى القراءة توهم داشين

مكتوب غنم للبيع، وأخرى بعران للبيع، وبعدها علف و و و و، بعدها فهمت على وين ساير إبن العم

الحاصل، وقفنا عند أحد مراعي إن صحة التسمية، ونزلنا

سلام يارجال

عليكم السلام يارجال إقلطوا إقلطوا

قال لهم ود العم، جاي من طرف فلان عشان النعوج اللي كلمكم عليهم

قال والنعم، هلا والله حلفت عليكم إن تقلطون وغداكم اليوم علانا

قلنا لا والله ما نكسر حلفك لكن ورانا مشوار كم ساعة لين ما نرجع لأهلنا

قال المكان مكانكم وإنتم الداشين وإحنا الطالعين

قلنا غدوتكم وصلت، بس نبي نمشي

المهم، كان مجهز لنا 5 او 6 نعجات نسيت بالضبط كم كانن، بس الظاهر إنهن كانن 5 نعجات

أخذناهم بـ 2000 ريال او تقل قليلا أذكر كانن هذيك السنة لما حسبناها تقريبا تطلع النعجة بـ 320 او 350 ريال هالحدود ما تزيد

الحاصل وأنا أخوكم ولا أكذبكم القول والله على ما أقول شهيد

كلها كم شهر، ما شفنا إلا النعاج صارن يولدن، أتاريهن كانن حاملات وإحنا وش عرفنا لهن، والأحسن والأفضل من إنهن يولدن، بعضهن يولدن توم يعني 2 في ولدة وحدة، والأحلى من هالأمر بعضهن يولد في السنة مرتين

الحاصل، بعد سنة ونص، صار عندنا خرفان ونعاج يا كثر، لدرجة إن إحنا مش ملحقين على علفهم، بعنا اللي بعناه وخلينا اللي خليناه

مرت سنة إلا وطالعة موضة التيس السوري ابو 30 الف ريال، والخروف المادري وش قالوا عنه وهالكلام

ود العم كلم الرجال يكلم راعي المرعى يشوف لنا خروف من الخرفان اللي اذا ولدت النعجة من ضربته ولها ينباع مدري بكم، عاد وجاء الخميس ونفس المنوال، اصحى يود العم ... إلخ

رحنا المرعى سلام يارجال

وعليكم السلام يارجال

إلخ

أخذنا هذا الخروف الفحل اللي رفعه متر وطوله من الراس للكفل مترين وتقول وانيت غمارتين

وكان سعره حول 1600 ريال، وطبعا هذك الأيام 1600 ريال على فحل ما ياخذه اللي المهبول

عاد رجعنا به، والكل قال لعبوا عليكم في سعره، واللي يقول غالي، واللي يقول إنضحك عليكم

واللي يقول إنتو مهابيل وهالكلام

تركناه من النعاج سنتين بعدها، وبدل المربط بنينا إثنين

وصار عندنا ما صار من خير ولله الحمد والمنة

بعنا اللي بعناه وخلينا اللي خليناه

الحاصل وأنا أخوكم

جت فترة نزل مرض على الخرفان، تجي دودة وتنخر في رجلهم وفي راسهم قريب من عينهم، وما خلينا بيطر إلا وجبناه ولا خلينا راعي حلال إلا وسألناه

وبالأخير طلع العلاج سهل، عطونا رشة كيماوي لونها ازرق او بنفسجي ما أذكر، وكانت تقتل الديدان

عاد مات ما مات، وبقى ما بقى

نوينا نبيعهم ونتقاسم الحلال

جبنا راعي حلال يشوفهم إذا له خاطر فيهم

والله ما أكذب عليكم والله على ما أقول شهيد وعسانا أخسر ما وراي وقدامي إن كنت قلت كلمة غير صحيحة

جاء الرجال وشافهم وعطانا سعر 50 الف ريال للحلال كامل

تخيل، مشروع بدأ بـ 2000 ريال وكم نعجة، بعد أربع سنوات إلى 5 سنوات جاب له 50 الف

المهم، طبعا بغينا نسوي البيعة رسمية، تعرف مبلغ كبير هذيك السنة وراح نودعه في البنك، يمكن يسألونا من أين لك هذا

شرطنا على الرجال تكون البيعة في مكتب العمدة في بلدنا وبوجود شهود

قال من طلبتوا شي، هيا

ركبنا الونيت وهو معانا، وإحنا في الطريق قال طلبتكم وأدري الحلال يستاهل بس بغيتكم تراعوني في كم ريال والمبلغ مو متوفر عندي هاليومين وأخاف اعطيكم كلمة ولا اقدر ادبر المبلغ وأخرب عليكم بيعتكم لأحد ثاني ومن هالكلام

وإحنا نحاول نمسك نفس السعر بس بالأخير ود عمي قال يسلم راسك نزلنا لك 5000 ريال

قال رحم الله والديكم

ألحين وصلنا مكتب العمدة

السلام

عليكم السلام

جايين ياعمدة نبيك تشهد علي بيعة

قال وش البيعة

قلنا بايعين حلالنا من الغنم بعدد كذا راس على هالمبروك

قال وكم السعر

قلنا له 45 الف

رد الرجال اللي المفروض يشتري قال لا مو احنا اتفقنا إنكم بتارعوني

قلنا له ايي، وشلنا عنك 5 الاف من اصل 50 الف، وصارت 45 الف

قال وانا طمعان في كرمكم، قلنا له ما يصير يا خوك متفقين وراعيناك وجايين وإحنا متفقين

عاد العمدة ملقوف، زي اللي حس إنه له سعي في الموضوع وإلا شي، او هذاك غمز له والله لليوم ما ندري وش صار

اللا العمدة داش في الموضوع وقاعد يتوسط ويحاول وفيه كم واحد جالسين في مكتب العمدة حق شرب شاي وقرقة مالها داعي، وداشين في الموضوع

عاد أنا وود العم نبي نفتك من هالبلوة، ونبي نفتك من التعب في مداراة الحلال

يمين يسار يمين يسار خلصت البيعة بـ 38 الف ريال

الحمدلله رب العالمين على ما أنعم به علينا

عاد تقاسمنا المبلغ وكل من طيره في شغلات وأمور دنيوية

الله يرحم بزمن أول، كان والله أحلى زمن

2000 ريال، تجيب 38 الف ريال بعد المكاسر في 5 سنوات

اسف ع التطويل، بس الظاهر من طلعت من السوق وأنا فيني كلام أبغى اطلعه

هههههههههههههههه

بالتوفيق للجميع

عندي سالفة مشروع ثاني دخلنا فيه، بس باقوله إذا شفت له وقت مناسب

وطبعا راس المال اقل من 2000 ريال

هههههههههههههه

سلام(ن) عليكم













رد مع اقتباس